كنا زمان في البلد

كُنَّا زَمَان فِي البَلَدْ بِنْعَوِّد أَصْغَر وَلَدْ عَلَى الثَّبَات وَالجَلَدْ وَتَكُون إِرَادَتُه حَدِيدْ **** بِنْدَرَّبُه يِشْتَغِلْ وَإِزَّاي يِقُوم بِالعَمَلْ مِنْ غَيْر كَلَل أو مَلَلْ وَيَكُون لُه رَأْي سَدِيدْ **** قَبْل الصِّبَا بِسِنِينْ آكِلِين سَوَا وَشَارْبِينْ حَامْدِين رَبَّنَا وَشَاكْرِينْ وَلَا حَدّ فِينَا وَحِيدْ **** يُومَاتِي بِنْكَلِّمُهْ وَلَيْلَاتِي بِنْعَلِّمُهْ وَنِسَاهِرُه وَنْفَهَّمُهْ وَنُلَاعِبُه لَعِب مُفِيدْ **** نِمْدَح لُه عَمُّه رَجَبْ وَنِحْكِي عَنْه العَجَبْ وَنِبَيِّن إِنَّه السَّبَبْ فِي العِزْوَة وَالتَّمْجِيدْ **** وَنَقُول لُه زُور عَمَّتَكْ وَلَا تَنْسَى يَوْم جَدَّتَكْ صَاحِب وِلَاد حِتَّتَكْ وَالجَدّ قُول لُه يَا سِيدْ **** وَالأُمّ بُوس إِيدَهَا دَايْمًا وَسَانِدْهَا وَاحْفَظْهَا وَاسْعِدْهَا تِحْيَا كَرِيم وَسَعِيدْ **** وَالخَالَة زَيّ أُمَّكْ وَالعَمَّة مِن دَمَّكْ وَكَمان وِلَاد عَمَّكْ زُورْهُم قَرِيب وَبَعِيدْ **** وَاوْصِل وِلَاد خَالَكْ تَلْقَى النَّعِيم جَالَكْ بِيهِم يِرُوق بَالَكْ والفِكرْ يبْقَى رشيدْ **** كُنَّا زَمَان فِي البَلَدْ بِنْحَفِّظ أَصْغَر وَلَدْ الرَّبّ وَاحِد أَحَدْ وَنِعَلِّمُه التَّجْوِيدْ **** بِاللَّيْل وَبَعْد العَشَا الواد يصلي العِشَا وَحَبَّتَيْن دَرْدَشَة وَيِنَام لِفَجْر جَدِيدْ **** يِصْحَى يِأَدِّي الفَرْضْ وَبِعَزْمُه يِرْوِي الأَرْضْ وَبِطُولْهَا أَو بِالعَرْضْ وَالإِيد تِشُدّ الإِيدْ **** يِشُوف نِعَم رَبِّنَا من بدري تِضْحَك لَنَا وجْيرانّا من أَهْلِنَا الكُلّ رَاضِي سَعِيدْ **** يِسْمَع حَكَاوِي الشَّجَرْ وَالمَيَّه وَيَّا الحَجَرْ بِتِغَنِّي مِن غَيْر وَتَرْ أَلْحَان صَفَا وَتَغْرِيدْ **** بِتِسَبِّح اللِّي خَلَقْ وَبِتِشْكَر اللِّي رَزَقْ وَاللِّي حَنَانُه سَبَقْ لِلْكَهْل وَالمَوَالِيدْ **** كُنَّا زَمَان فِي البَلَدْ بِنِحِبّ مِن غَيْر نَكَدْ وَالكُلّ ضَهْر وَسَنَدْ لِلْكُلّ فِي المَوَاعِيدْ