پاکستان اور سلطنتِ عمان کثیر الجہتی تعاون کو وسعت دینے کے عزم کا اعادہ کرتے ہیں

اسلام آباد - 14 اکتوبر (کوئنا) -- پاکستان کے نائب وزیر اعظم اور وزیر خارجہ محمد اسحاق دار اور عمان کے وزیر خارجہ بدر البوسیدی نے بدھ کو دونوں ممالک کے درمیان تجارت، سرمایہ کاری اور سمندری نقل و حمل سمیت متعدد شعبوں میں باہمی تعاون کو وسعت دینے کے عزم کا اظہار کیا۔ پاکستانی وزارت خارجہ کے بیان میں بتایا گیا کہ یہ بات اسلام آباد میں پاکستان اور سلطنت عمان کے درمیان مشترکہ وزارتی کمیٹی کی آٹھویں میٹنگ کے اختتام پر کہی گئی۔ بیان میں وضاحت کی گئی کہ دونوں فریقین نے اپنے درمیان مضبوط بھائی چارے والے تعلقات کی تصدیق کی اور تجارت، سرمایہ کاری، سمندری نقل و حمل، لاجسٹکس، زراعت، صنعت، توانائی، تعلیم، معلوماتی ٹیکنالوجی، انسانی وسائل کی ترقی اور موسمیاتی تبدیلی جیسے شعبوں میں باہمی تعاون کو وسعت دینے پر زور دیا۔ بیان میں مزید کہا گیا کہ دونوں فریقین نے پاکستانی اور عمانی عوام کے درمیان رابطوں کو مضبوط بنانے اور مزدوروں کی نقل و حرکت کو آسان بنانے کے ساتھ ہی تجارتی وفود کے تبادلے کی ضرورت پر زور دیا۔ اس کے علاوہ، دونوں فریقین نے تجارت، سرمایہ کاری، زراعت، تیل اور گیس، محنت اور انسانی وسائل کی ترقی جیسے شعبوں میں مشترکہ ورکنگ گروپس کو فعال بنانے پر اتفاق کیا تاکہ معاہدوں کی عمل درآمد یقینی بنائی جا سکے اور ادارہ جاتی تعاون کو فروغ دیا جا سکے۔ علاقائی معاملات کے حوالے سے اسحاق دار نے ضبطِ نفس، کشیدگی میں کمی، گفت و شنید اور سفارت کاری کی حوصلہ افزائی اور ہرمز اور باب المندب کے تنگ راستوں میں بحری نقل و حمل کی حفاظت کو یقینی بنانے کی اہمیت پر زور دیا۔ انہوں نے سعودی عرب پر حوثی حملوں کی مذمت کرتے ہوئے پاکستان کی جانب سے سعودی عرب کے ساتھ یکجہتی، اس کی خودمختاری اور سلامتی کی حمایت کا اظہار کیا۔ انہوں نے فلسطینی عوام اور ان کے حقوق کے لیے پاکستان کے مستقل تعاون کی تجدید کی اور اقوام متحدہ کے متعلقہ قراردادوں کے مطابق فلسطینی مسئلے کے منصفانہ اور مستقل حل کی طرف پہنچنے کے ساتھ ساتھ غزہ کے علاقے میں انسانی امداد بغیر کسی رکاوٹ کے پہنچانے کی یقین دہانی کرانے کا مطالبہ کیا۔ (اختتام) س ب ک / ا م س