भारतको असम राज्यमा आएको बाढीबाट मृत्यु हुनेको संख्या बढेर ९८ पुगेको छ
भारतको उत्तर-पूर्वी राज्य असममा आएको बाढीका कारण मृतकको सङ्ख्या ९८ पुगेको छ भने १३ जिल्लामा करिब १ लाख ५५ हजार जना प्रभावित भएका छन्।
भारतीय समाचार एजेन्सी 'प्रेस ट्रस्ट अफ इन्डिया' ले शनिबार राज्यको आपदा व्यवस्थापन प्राधिकरणले जारी गरेको आधिकारिक विज्ञप्ति उद्धृत गर्दै बाढीको पानीले ४६४ वटा गाउँहरूमा असर पारेको र प्रभावितको कुल सङ्ख्या १ लाख ५५ हजार ८ सय ४९ पुगेको जानकारी दिएको छ।
गोलघाट जिल्लामा सबैभन्दा बढी ५८ हजार ७ सय ५० जना प्रभावित भएका छन्, त्यसपछि सिवसागरमा ४८ हजार २ सय ८६ जना र जोरहाटमा २५ हजार २ सय ५९ जना प्रभावित भएका छन्।
बाढीले करिब १० हजार ७ सय ४८ हेक्टर कृषि जमिन डुबानमा परेको छ भने ४७ हजारभन्दा बढी पशुचौपाया प्रभावित भएका छन्।
आधिकारिक विज्ञप्ति अनुसार बाढीले सडक, पुल र घरलगायत पूर्वाधारमा पनि क्षति पुर्याएको छ।
